КъватIибе бачIана «Гъуниб» казияталъул иргадулаб номер. Гьеб байбихьулеб буго цIияб цIалул соналъул баркиялдаса. Казияталда бицунеб буго районалъул щибаб росдал школалда лъаялъул къо-Iсентябрь араб къагIидаялъул. БитIун бицани, церехун соназде данде ккун гьеб тадбиралъул дагьаб гIатIидго бицун буго казияталда. КIиабилеб гьумералда буго терроралде данде чIеялъул хIакъалъулъ бицунеб материал. Гьелда бан, 3 снтябралда гьарурал тадбиразул хIакъалъулъ. Редакциялда гIадатлъун лъугьун буго машгьурал гIадамазулгун дандчIваял гьарулеб къагIида. Гьаб нухалъ газеталъул цIалдолезда цеве вахъунев вуго цIар рагIарав Кудалиса академик Ибрагьимхан Камилов. Щуабилеб гьумералда цIалдолезда батила араб августалъулаб совещаниялъул материал...

Ассаламу гIалайкум, хIурматиял гьалмагъзаби, нилъерго бакIги гIадатгун тарихги хириял унго-унгоял гьудулзаби! Жакъа нилъеца рагьулеб буго Гъуниб районалъул казияталъ нахъа толеб 100 соналда жаниб т1оцебе «Эркенаб ГЪУНИБ» абураб сайт. Гьелда жанисан нужер лъайхъвай гьабизе рес букIине буго тIоцебе «Гъуниб» казияталъулгун. Сайталъ жанире рачине руго нилъер гIумруялъул киналго темаби : жамгIият, дин, маданият, адабият, нилъер район, республика, улка бахун къватIиб гIумру гьабун ругел ракьцоял, малъа-хъваял, жеги ккара-тараб, батIибатIиял очеркал, тарихиял хIужаби… Гьенибго нужеда батила «Эркенаб ГЪУНИБ» абураб видио каналги. Гьедин рачIунел руго нилъ «Гъуниб» казияталъ нусго сон тIубаялде.